Рымтай Ізбастин турнирі: Павлодарда жас балуандар республикалық додада бақ сынады
Павлодар қаласындағы «Баянтау» спорт сарайында Ұлы Отан соғысының ардагері, Баянауыл ауданының Құрметті азаматы Рымтай Ізбастинді еске алуға арналған қазақ күресінен жасөспірімдер арасындағы республикалық турнир өтті.
Биыл бұл дәстүрлі жарыс 10-рет ұйымдастырылды. Турнирге 2009-2010 жылдары туған жас балуандар қатысып, екі күн бойы бозкілемде өзара мықтыны анықтады. Жарыс бағдарламасына 9 салмақ дәрежесі енгізілді. Атап айтқанда, жас спортшылар -50, -55, -60, -65, -70, -76, -82, -90 және +90 келі салмақтарында белдесті.
Республикалық турнир жас балуандар үшін тек жүлде жолындағы жарыс қана емес, үлкен спортқа жасалған маңызды қадам болды. Мұндай додалар өңірлердегі дарынды спортшыларды анықтап, олардың республикалық деңгейде тәжірибе жинауына жол ашады. Әсіресе жасөспірімдер санатындағы жарыстарда спортшының мінезі, төзімі, тактикалық ойлауы және жарысқа психологиялық дайындығы айқын көрінеді.
Салтанатты ашылу рәсімінде Павлодар облысы әкімінің бірінші орынбасары Серік Батырғожинов сөз сөйлеп, өңір басшысы Асайын Байхановтың құттықтау хатын оқып берді. Құттықтау барысында Рымтай Ізбастиннің Баянауыл ауданы мен жалпы Павлодар облысының дамуына қосқан үлесі ерекше атап өтілді.
Сондай-ақ жарысқа Маңғыстау облысы әкімінің бірінші орынбасары Асхат Оралов, Qazaq Kuresi Ассоциациясының бас директоры Мейіржан Берекетов және спорт саласының белгілі өкілдері қатысты. Турнирдің ұйымдастырылуы қазақ күресінің жас буын арасындағы беделін арттырып, ұлттық спорттың тәрбиелік және әлеуметтік маңызын тағы бір мәрте көрсетті.
Айта кетейік, дәстүрлі турнир «Самұрық-Қазына» әл-ауқат қоры» акционерлік қоғамы және Sport Qory туризм индустриясы мен спортты қолдау қорының демеушілігімен өткізілді. Аталған қолдау жарыстың жоғары ұйымдастырушылық деңгейде өтуіне, жас спортшыларға қажетті жағдай жасауға және қазақ күресін жасөспірімдер арасында кеңінен насихаттауға мүмкіндік берді.
Жарыс қорытындысы бойынша жеңімпаздар мен жүлдегерлерге чемпиондық белдіктер, ақшалай сертификаттар және білім гранттары табысталды. Бұл турнирдің жас балуандар үшін спорттағы жетістікпен қатар, болашақ білім жолына да мүмкіндік беретін ерекше алаңға айналғанын көрсетті.
